بعنوان: الدنيا خارجة لحكام
نسولك اخويا
فين دوك لصحاب
لكانو ظراف
دوك الجيران لرهاف
خفيفة زورت اضياف
خطواتهم
خفاف.....
فين لحباب
لغبرو مابانو
قطعو لكلام
حبسو الرجل ع الرسام
غرايبي غرايب
نفتل الدوم گفاف
هدا ما كتاب
والخا نكرو راني
مسعاف....
ضارب لحساب
ها العار فهموني
غدرتني ليام
خانوني لكتاف
الدنيا خارجة لحكام
غرامها ولاف
العاقل يطلب السترة
الكفاف
والعفاف...
لسلباتو ضاعت حياتو
تلقاه ع القبلة تالف
لركابي طالقة السالف
تلقاه مسكون يخمم
ياكل صباعو
العلامة
بونتاف....
لكرماتو
في الخير مرغداتو
بلا اسباب
يعمر لقراب
علام عودو
علاف...
رضينا بالمكتوب
والهم مارضا بنا
عيب وعار
الحق مسلوب
تخسر لخواطر
حسبناهم اشراف
يوقع لغيار
يحفف تحفاف
يحلف بالنعمة
يدعي بالجفاف....
ظلمت الخيمة ياالميمة
طفات الشموع
شدت فينا عوينة يالحبيبة
مشات ليام الزينة
گفات عطات بالگفا
مبقالها رجوع
كبر الجفا
الخريف خرف
تخراف....
ياخويا
يا بن عمي
الكروش شبعانة
عافطة ع الشوك بالحفا
المصارن عاميها الجوع
شحال من عيفة
عايش بالممنوع
مرايتو زاج شفاف
الفضيحة ف جيبو
بالحلوف حلاف
مدوخو المصروف
واش هبيل ولا حسراف
28/10/2018
بقلم محمد البراقي الحسناوي
ليست هناك تعليقات:
إرسال تعليق