بعنوان: حمادة وحلوفي
ابني حسن
بلاد الثرات والفن
حمادة وحلوفي
برمة حليب قلوشة اسمن
نحرك كتوفي
جنب نوالة نتدفن
غادي نموت نموت
الليلة أحسن
الهيت جدبت حسناوة
يتحطو ع الجرح يداوى
يطيرو لحزن
ريح الغابة سلاگ هوهاوى
نصفق بكفوفي
نبرد جوفي
لمقص ولگوال
يفاجيو لهوال
نتصنت لعظامي نتركن
الخيل والخليل
العينين بوحبة
كحلهم بارود
قتلولي لهوا
اصبع ع القرص
موجود....
عيطت عيطة حنينة
الادهم يحنحن
تحرفت السلاح
من الغروب للصباح
الصيدة ع الگنفود
لحجل طالق الجناح
الحافر والگاعة
اللوح والشطابة
شعير وقمح
العلافة تحفن
القصرية تعجن
يسخن الطرح
الله يطلق لسراح
يا لجواد
مول الجود
يجود....
لمن نسمع
اليوم كلاو لحدود
كلها يلغي بلغاه
تلفو آثر جدود
الديب يمشي عينو ف گفاه
عند بالو محسود
الضبع ريحتو مخيباه
الحلوف ملهوف
شوف طريقو مسدود
السبع النفخة مشرفاه
مكبلينو
بقيود.....
طويل اللسان
حرش وعيا شي مداه
دار المجهود
عيني تدمع
على داك العيان
فسخ العهود
لنواه ما لحقو حجارو شداه
اصلو صگع
خليقة صفت القرود
شحال منهم كارمن
جلود....
كاين لبطانتو صافية تلمع
العلام باين لبغا يتعاما
كلمتو مسموعة ف المجمع
الجودة وارثها من الباه
ولف عادة تتعادى
الكريم زعامة وقامة
ياسعد السعود
كيف ندير ف ليلتي الغريبة
النار شاعلة
الخشبة اللوح موسداه
حفرت مطمورة
طمرت من الدنوب المدود
يا لوليد
كلها يبكي على بكاه
الحقد ف النفوس مولود
يحوزك التراب
ينخرك الدود
قبرك للقبلة ممدود
28/10/2018
بقلم محمد البراقي الحسناوي
ليست هناك تعليقات:
إرسال تعليق